‘હિન્દુ ધર્મ પૂરો થઈ જશે, મુસ્લિમ બની જાઓ…’

સુરત રેગિંગકાંડમાં સસ્પેન્ડેડ એચ ઓડીડૉ. સુમૈયા મુલ્લા પર ગંભીર આરોપો

સુરતમાં ડૉ. હર્ષ પંડ્યા આપઘાત અને રેગિંગ કેસમાં માઇક્રોબાયોલોજી વિભાગના એચઓડી ડૉ. સુમૈયા મુલ્લાને ૯૦ દિવસ માટે સસ્પેન્ડ કરવામાં આવ્યા છે. જો કે, આ નિર્ણય બાદ ભૂતપૂર્વ વિદ્યાર્થીઓ દ્વારા ડૉ. સુમૈયા મુલ્લા વિરુદ્ધ અત્યંત ગંભીર અને ચોંકાવનારા ખુલાસાઓ કરવામાં આવ્યા છે. વિદ્યાર્થીઓનો આરોપ છે કે, એચઓડી હિન્દુ વિરોધી માનસિકતા ધરાવતા હતા અને વિદ્યાર્થીઓ પર કલમા પઢવા તથા નમાજ અદા કરવા દબાણ કરતા હતા.

એક ભૂતપૂર્વ રેસિડેન્ટ વિદ્યાર્થિનીએ પોતાની આપવીતી જણાવતા કહ્યું કે, “રેસિડેન્સી દરમિયાન મને એક રૂમમાં લઈ જઈને નમાજ પઢવાની ફરજ પાડવામાં આવી હતી. જે રીતે તેઓ હાથ-મોઢું ધોવે (વઝૂ કરે) તે જ રીતે મને કરવા કહેવામાં આવતું હતું. મને એટલી હદે માનસિક અને શારીરિક ત્રાસ આપવામાં આવ્યો હતો કે મેં આત્મહત્યા કરવાનો વિચાર કરી લીધો હતો. પરંતુ મારા માતા-પિતા, મિત્રો અને સપોર્ટિવ સ્ટાફના કારણે હું આ કદમ ઉઠાવતા બચી ગઈ.”

પીડિત વિદ્યાર્થિનીએ વધુમાં ઉમેર્યું કે, ‘ડૉ. સુમૈયાના કારણે જ તેનું એમડી એક વર્ષ મોડું પૂરું થયું હતું. પરીક્ષા વખતે અન્ય સ્ટાફને બહાર કાઢીને તેઓ જાતે બેસતા અને વિદ્યાર્થિનીના વીડિયો ઉતારતા હતા. એક તબક્કે છ મહિના માટે ડિટેઇન કરીને નાપાસ પણ કરવામાં આવ્યા હતા. આ ઉપરાંત, ડૉ. સુમૈયા વિદ્યાર્થીઓ પાસે પોતાની પ્રાઇવેટ લેબના કામ પણ કરાવતા હતા.’

અન્ય એક કિસ્સાનો ઉલ્લેખ કરતા વિદ્યાર્થિનીએ જણાવ્યું કે, ડૉ. સુમૈયા અવારનવાર હિન્દુ ધર્મ વિશે અણછાજતી ટિપ્પણીઓ કરતા હતા. એક કાર્યક્રમ દરમિયાન તેમણે અન્ય એક મેડમને કહ્યું હતું કે, “તમે ધર્મ પરિવર્તન કરીને મુસ્લિમ બની જાઓ, હિન્દુ ધર્મમાં કંઈ રાખ્યું નથી અને તે ટૂંક સમયમાં પૂરો થઈ જવાનો છે.”