એસ-૪૦૦ ના ડરથી પાકિસ્તાન ફફડ્યું

પાકિસ્તાન સામે મે ૨૦૨૫ માં હાથ ધરવામાં આવેલા ‘ઓપરેશન સિંદૂર’ને લઈને પશ્ચિમી વાયુ કમાનના તત્કાલીન પ્રમુખ એર માર્શલ (નિવૃત્ત) જિતેન્દ્ર મિશ્રાએ મોટા અને ચોંકાવનારા ખુલાસા કર્યા છે. તેમણે જણાવ્યું કે, આ સૈન્ય સંઘર્ષ દરમિયાન ભારતની રશિયા નિર્મિત એસ-૪૦૦ એર ડિફેન્સ સિસ્ટમ સૌથી મોટી ગેમ-ચેન્જર સાબિત થઈ હતી. આ મિસાઈલ ડિફેન્સ સિસ્ટમનું ચોક્કસ લોકેશન શોધવા માટે પાકિસ્તાન એટલું હતપ્રભ બની ગયું હતું કે તેણે ભારતમાં પોતાના જાસૂસો અને સ્લીપર સેલને સક્રિય કરી દીધા હતા.

એર માર્શલ મિશ્રાએ જણાવ્યું કે ઓપરેશન સિંદૂર દરમિયાન ભારતના એસ-૪૦૦ એર ડિફેન્સ સિસ્ટમના ડરથી પાકિસ્તાની વાયુસેનાના ફાઈટર જેટ ભારતીય સરહદથી ૨૦૦ કિલોમીટરના વિસ્તારમાં પણ આવવાની હિંમત કરી શક્યા નહોતા. એસ-૪૦૦ ની ચોક્કસ સ્થિતિ જાણવા માટે પાકિસ્તાને તમામ પ્રયાસો કર્યા હતા. તેમને ચીન જેવા અન્ય દેશો તરફથી રિયલ-ટાઇમ સેટેલાઇટ ડેટા મળી રહ્યો હતો અને સાથે જ તેમણે ભારતમાં પોતાના જાસૂસોને પણ કામે લગાડ્યા હતા.

ભારતીય દળોએ પાકિસ્તાનના ગ્રાઉન્ડ રડાર નષ્ટ કરી દીધા બાદ પાકિસ્તાને સરગોધાથી પોતાનું એરબોર્ન સર્વેલન્સ (હવાઈ નિરીક્ષણ) વિમાન હવામાં ઉડાડ્યું હતું. તે સમયે ભારતીય એસ-૪૦૦ ઓપરેટરે ૩૧૪ કિલોમીટરની ઐતિહાસિક અંતરેથી સચોટ નિશાન સાધીને તેને હવામાં જ તોડી પાડ્યું હતું. સૈન્ય ઇતિહાસમાં જમીન પરથી હવામાં માર કરતી મિસાઈલ (સરફેસ-ટુ-એર) દ્વારા સૌથી વધુ અંતરે કરવામાં આવેલો આ સર્વશ્રેષ્ઠ શિકાર છે.

પહલગામમાં થયેલા આતંકી હુમલામાં ૨૫ પ્રવાસીઓના મોત બાદ ભારતે ૭ મેના રોજ ‘ઓપરેશન સિંદૂર’ શરૂ કર્યું હતું. આ ઓપરેશન હેઠળ જૈશ-એ-મોહમ્મદ અને લશ્કર-એ-તૈયબાના ૯ આતંકવાદી કેમ્પોને ધ્વસ્ત કરવામાં આવ્યા હતા. સરકાર તરફથી સૈન્ય નેતૃત્વને યોજના બનાવવાની સંપૂર્ણ છૂટ અપાઈ હતી અને માત્ર આતંકવાદીઓ અને તેમના આકાઓને જ નિશાન બનાવવાની સ્પષ્ટ સૂચના હતી, જેથી સામાન્ય નાગરિકોને કોઈ નુકસાન ન થાય.