દિશા સાલિયાન કેસમાં છ વર્ષ બાદ મોટો વળાંક

દિવંગત અભિનેતા સુશાંત સિંહ રાજપૂતની મેનેજર રહી ચૂકેલી દિશા સાલિયાનના મોતના કેસમાં આશરે છ વર્ષ બાદ મોટું અપડેટ સામે આવ્યું છે.

બોમ્બે હાઈકોર્ટના નિર્દેશ બાદ સીબીઆઈએ આ મામલે એફઆઈઆર નોંધીને તપાસ પોતાના હાથમાં લીધી છે. હવે સામે આવેલી એફઆઈઆર ની નકલમાં અનેક ગંભીર દાવા અને મુદ્દાઓનો ઉલ્લેખ કરવામાં આવ્યો છે, જેની તપાસ કેન્દ્રીય એજન્સી કરશે.

આમાં ગેંગરેપ અને હત્યાથી લઈને પુરાવા સાથે છેડછાડ, પોલીસ રેકોર્ડમાં ફેરફાર અને દિશાના મોબાઇલ ફોન સાથે જોડાયેલી અનેક ગેરરીતિઓ તથા આરોપોનો સમાવેશ થાય છે.

દરમિયાન શુક્રવારે દિશાના પિતા સતીશ સાલિયાને પણ સીબીઆઈ અધિકારીઓ સમક્ષ ચાર કલાકથી વધુ સમય સુધી પોતાનું નિવેદન નોંધાવ્યું હતું. તેઓ પોતાના વકીલ નીલેશ ઓઝા સાથે સીબીઆઈ અધિકારીઓ સમક્ષ પહોંચ્યા હતા.

સતીશ સાલિયાન અગાઉ પણ પોતાની પુત્રીના મોતને લઈને બોમ્બે હાઈકોર્ટમાં અરજી દાખલ કરી ચૂક્યા છે. તેમણે આરોપ લગાવ્યો હતો કે દિશા સાથે ગેંગરેપ કરવામાં આવ્યો હતો અને ત્યારબાદ તેની હત્યા કરવામાં આવી હતી. પોતાની અરજી અને નિવેદનમાં તેમણે કેટલાક પ્રભાવશાળી લોકો તેમજ પોલીસ અધિકારીઓ પર પણ ગંભીર આરોપો લગાવ્યા હતા.

એફઆઈઆર માં કયા લોકોની ભૂમિકાની તપાસની વાત?

એફઆઈઆર ની નકલમાં કહેવામાં આવ્યું છે કે દિશા સાલિયાનના મોત સાથે જોડાયેલા મુખ્ય ગુનાઓ, કથિત ગુનાહિત કાવતરું, બાદમાં બનાવવામાં આવેલી અને પ્રચારિત કરવામાં આવેલી કથિત ખોટી આત્મહત્યાની કહાણી તેમજ પુરાવાઓને દબાવવા, નષ્ટ કરવા અથવા તેમાં કથિત રીતે છેડછાડ કરવાની તપાસ જરૂરી છે.

આ સંદર્ભમાં એફઆઈઆર માં જે લોકોની ભૂમિકાની તપાસ કરવાની વાત કરવામાં આવી છે, તેમાં આદિત્ય ઠાકરે, રોહન રોય, ડિનો મોરિયા, સૂરજ પંચોલી, આદિત્ય ઠાકરેના બોડીગાર્ડ, રિયા ચક્રવર્તી, શોવિક ચક્રવર્તી, સચિન વાઝે, પરમબીર સિંહ, તત્કાલીન ડીસીપી વિશાલ ઠાકુર, ઉદ્ધવ ઠાકરે, અનિલ દેશમુખ, એપીઆઈ અશોક દેવઢે, પીઆઈ જગદેવ કલાપાડ, પીઆઈ શૈલેન્દ્ર નાગરકર, પીઆઈ ચિમાજી અઢાવ, પીઆઈ અર્જુન રજાણે અને માલવણી પોલીસ સ્ટેશનના સંબંધિત અધિકારીઓનો સમાવેશ થાય છે.

આ ઉપરાંત એફઆઈઆર માં મોડેથી કરવામાં આવેલા પોસ્ટમોર્ટમ સાથે જોડાયેલા ડોક્ટરો અને સ્ટાફ, ડૉ. સંજય જાધવ, કલિના ફોરેન્સિક સાયન્સ લેબોરેટરી સાથે જોડાયેલા અધિકારીઓ અને એન.પી. ભાલેનો પણ ઉલ્લેખ કરવામાં આવ્યો છે.

રીજન્ટ ગેલેક્સી બિલ્ડિંગના સુરક્ષા ગાર્ડ સુશીલ કુમાર યાદવ અને શિવમુરાદ ગૌતમ ઉર્ફે મુન્નાના નામ પણ નોંધવામાં આવ્યા છે.

આ સિવાય પ્રીતિ રાણે, પ્રવીણ રાણે, અંકિતા સાતુર, ઇન્દ્રનીલ વૈદ્ય, દીપ અજમેરા, હિમાંશુ શિખારે, રેશા પડવાલ, સતવંત સિંહ, નવેદ મુઝાવર અને પ્રિયેશ રાણે સહિત એસઆઈટી ના વરિષ્ઠ સભ્યો અને જે વરિષ્ઠ પોલીસ અધિકારીઓની દેખરેખ હેઠળ તપાસ કરવામાં આવી હતી, તેમની ભૂમિકાની પણ તપાસ કરવાની વાત એફઆઈઆર માં કરવામાં આવી છે. એફઆઈઆર માં અન્ય અજાણ્યા લોકોનો પણ સમાવેશ કરવામાં આવ્યો છે.

જોકે, એ ખાસ મહત્વનું છે કે એફઆઈઆર માં કોઈ વ્યક્તિની ભૂમિકાની તપાસ કરવાની વાત થવી એ વ્યક્તિને દોષિત કે આરોપી સાબિત કરતી નથી. આ તમામ દાવાની પુષ્ટિ સીબીઆઈ ની તપાસ અને ઉપલબ્ધ પુરાવાઓના આધારે જ થઈ શકશે.

દિશાના મોબાઇલ ફોન અંગે એફઆઈઆર માં શું કહેવામાં આવ્યું?

એફઆઈઆર માં દિશાના મોબાઇલ ફોનને લઈને અનેક ગંભીર વિરોધાભાસોનો ઉલ્લેખ કરવામાં આવ્યો છે. દસ્તાવેજમાં કહેવામાં આવ્યું છે કે અલગ-અલગ નિવેદનો અને રોહન રોયના નિવેદન તથા ઇન્ટરવ્યૂના આધારે સવાલ ઊભો થાય છે કે પોલીસે ૯ જૂન ૨૦૨૦ ના રોજ સવારે આશરે ૦૯:૪૦ વાગ્યે દિશાનો મોબાઇલ પોતાના કબજામાં લઈ લીધો હતો.

પરંતુ એફઆઈઆર મુજબ, ફોન જપ્ત કરવામાં આવ્યો હોવાનું દર્શાવવામાં આવ્યું હોવા છતાં બાદમાં મીડિયા અહેવાલોમાં સામે આવ્યું હતું કે ફોન સક્રિય રહ્યો હતો અને ત્યારબાદ પણ તેનો ઉપયોગ કરવામાં આવ્યો હતો.

ત્યારબાદ પોલીસ તરફથી એવું સ્પષ્ટીકરણ આપવામાં આવ્યું હોવાનું કહેવાય છે કે સુશાંત સિંહ રાજપૂતના મોત બાદ સંભવિત કનેક્શનની તપાસ માટે ફોનને ફરીથી ખોલવામાં આવ્યો હતો.

એફઆઈઆર માં દાવો કરવામાં આવ્યો છે કે આ સ્પષ્ટીકરણ પણ ઉપલબ્ધ સામગ્રી સાથે મેળ ખાતું નહોતું. ત્યારબાદ અગાઉના જપ્તી રેકોર્ડને દબાવી દેવામાં આવ્યા અથવા નષ્ટ કરવામાં આવ્યા અને ફોન ક્યારે તથા કયા સંજોગોમાં જપ્ત કરવામાં આવ્યો હતો તે અંગે સત્તાવાર રેકોર્ડમાં અલગ કહાણી નોંધવામાં આવી હતી.

એફઆઈઆર માં એવો પણ ગંભીર દાવો કરવામાં આવ્યો છે કે દિશાનો મોબાઇલ ફોન સચિન વાઝે અને આદિત્ય ઠાકરેના કબજામાં રહ્યો હતો અને તેનો ઉપયોગ કરવામાં આવ્યો હતો.

દસ્તાવેજ મુજબ, ફોનમાંથી એવી વ્યક્તિઓની ઓળખ કરવા માટે માહિતી મેળવવામાં આવી હતી, જેમની સાથે દિશાએ ઘટનાને લગતી વાતચીત કરી હતી અથવા જેઓ સંભવિત સાક્ષી બની શકે તેમ હતા અથવા કેસ સાથે જોડાયેલા લોકો માટે ખતરો ઊભો કરી શકે તેમ હતા.

મેડિકલ રેકોર્ડને લઈને પણ એફઆઈઆર માં સવાલો

એફઆઈઆર માં આગળ આરોપ તરીકે કહેવામાં આવ્યું છે કે આવા સંભવિત સાક્ષીઓની ઓળખ થયા બાદ તેમને ખતમ કરવાનો પ્રયાસ કરવામાં આવ્યો હતો, ધમકી આપવામાં આવી હતી, દબાણ કરવામાં આવ્યું હતું અથવા માહિતી જાહેર કરતા રોકવામાં આવ્યા હતા.

આ ઉપરાંત દિશાના મોબાઇલ ફોનમાં રહેલા સંબંધિત ડેટાને એક્સેસ, ડિલીટ, તેમાં છેડછાડ અથવા અન્ય રીતે પ્રભાવિત કરવામાં આવ્યો હોવાનો પણ આરોપ છે, જેથી પુરાવાની કડી નષ્ટ કરી શકાય.

એફઆઈઆર માં મેડિકલ અને પોલીસ રેકોર્ડનો ઉલ્લેખ કરીને કહેવામાં આવ્યું છે કે દિશાના યોનિ અને ગુદાના સ્વેબ લેવામાં આવ્યા હતા અને તપાસ માટે ફોરેન્સિક સાયન્સ લેબોરેટરીમાં મોકલવામાં આવ્યા હતા.

આ મેડિકલ સામગ્રી, પોસ્ટમોર્ટમ રિપોર્ટ અને તેની સાથે જોડાયેલા રેકોર્ડની પણ તપાસ કરવામાં આવશે.

૮ જૂન ૨૦૨૦ ના રોજ દિશાનું મોત થયું હતું

દિશા સાલિયાન સેલિબ્રિટી મેનેજર હતી અને તેણે થોડા સમય માટે દિવંગત અભિનેતા સુશાંત સિંહ રાજપૂત સાથે પણ કામ કર્યું હતું.

૮ જૂન ૨૦૨૦ ના રોજ મુંબઈના માલાડ વિસ્તારમાં એક હાઈરાઈઝ બિલ્ડિંગ પરથી નીચે પડી જતાં તેનું મોત થયું હતું. તેના થોડા જ દિવસ બાદ ૧૪ જૂન ૨૦૨૦ ના રોજ સુશાંત સિંહ રાજપૂતનું પણ મોત થયું હતું. જેના કારણે બંને કેસને લઈને લાંબા સમયથી અનેક પ્રકારની ચર્ચાઓ થતી રહી છે.

દિશાના મોત સમયે મુંબઈ પોલીસે શરૂઆતમાં આ ઘટનાને અકસ્માત મોત તરીકે નોંધાવી હતી. ત્યારબાદની તપાસમાં આત્મહત્યાની વાત સામે આવી હતી અને પોલીસે કોઈ કાવતરું કે ફાઉલ પ્લેના પુરાવા મળ્યા ન હોવાનું જણાવ્યું હતું.

આદિત્ય ઠાકરેએ આરોપોને ગણાવ્યા હતા પાયાવિહોણા

આ મામલે શિવસેના (યુબીટી)ના નેતા આદિત્ય ઠાકરેનું નામ સતીશ સાલિયાની અરજીમાં પણ આવ્યું હતું. આદિત્ય ઠાકરેએ આ આરોપોને પાયાવિહોણા ગણાવ્યા હતા.

તેમણે કહ્યું હતું કે દિશા સાલિયાનના મોત સાથે તેમને કોઈ લેવાદેવા નથી અને આ સમગ્ર મામલાને તેમને બદનામ કરવાના પ્રયાસ તરીકે ગણાવ્યો હતો.

દરમિયાન, ૨ સપ્ટેમ્બરના રોજ બોમ્બે હાઈકોર્ટે સીબીઆઈ ને દિશા સાલિયાનના મોતની તપાસ કરવા અને એફઆઈઆર નોંધવાનો નિર્દેશ આપ્યો હતો. કોર્ટે મુંબઈ ક્ષેત્રના સીબીઆઈ જોઈન્ટ ડિરેક્ટરને અનુભવી અને વરિષ્ઠ અધિકારીને તપાસ અધિકારી તરીકે નિયુક્ત કરવાનો નિર્દેશ આપ્યો હતો.

કોર્ટે એ પણ સ્પષ્ટ કર્યું હતું કે પૂરતા પુરાવા સામે ન આવે ત્યાં સુધી કોઈ પણ વ્યક્તિને આરોપી માનવામાં ન આવે.

હવે સીબીઆઈ ની એફઆઈઆર માં નોંધાયેલા આ તમામ મુદ્દાઓ બાદ આશરે છ વર્ષ જૂના દિશા સાલિયાન કેસમાં તપાસનો વ્યાપ મહત્વપૂર્ણ બની ગયો છે.

દિશાના મોતની રાત્રે ખરેખર શું થયું હતું, તેના મોતના સંજોગો શું હતા, મેડિકલ અને પોલીસ રેકોર્ડમાં શું થયું હતું, મોબાઇલ ફોનને લઈને ઉઠેલા સવાલોનું સત્ય શું છે અને એફઆઈઆર માં નોંધાયેલા વિવિધ આરોપોમાં કેટલી સચ્ચાઈ છે—આ તમામ સવાલોના જવાબ હવે સીબીઆઈ ની તપાસમાં શોધવામાં આવશે.

હાલ આ કેસમાં સૌથી મોટો સવાલ એ છે કે એફઆઈઆર માં નોંધાયેલા આ ગંભીર દાવાની તપાસ કર્યા બાદ સીબીઆઈ ના હાથમાં કયા નવા પુરાવા આવે છે અને છ વર્ષથી વણઉકેલાયેલા સવાલો અંગે તપાસ એજન્સીનો રિપોર્ટ શું હકીકત સામે લાવે છે.