ગુજરાત મહિલા કોંગ્રેસ પ્રમુખનો પુત્ર ને એટીએસ એ ગાળિયો કસ્યો

ગુજરાત મહિલા કોંગ્રેસ પ્રમુખનો પુત્ર બોગસ પાસપોર્ટ લઈને ૬ દેશો ફરી આવ્યો!

કોર્ટ અથવા એન્ફોર્સમેન્ટ ડિરેક્ટોરેટ જેવી કેન્દ્રીય એજન્સીઓ જ્યારે કોઈ ગંભીર કેસમાં આરોપીનો પાસપોર્ટ જપ્ત કરે છે, ત્યારે તેનો મુખ્ય ઉદ્દેશ્ય આરોપી દેશ છોડીને ભાગી ન જાય તે સુનિશ્ચિત કરવાનો હોય છે. પરંતુ અમદાવાદના એક શખ્સે કાયદાના આ સકંજાને તોડવા માટે એવો પ્લાન ઘડ્યો જેને જાણીને સુરક્ષા એજન્સીઓ પણ ચોંકી ગઈ છે. પોતાનો મૂળ પાસપોર્ટ તપાસ એજન્સી સમક્ષ જમા હોવાની બાબત છુપાવીને, ખોટા સરનામા અને દસ્તાવેજોના આધારે ઉત્તર પ્રદેશમાંથી બીજો નવો પાસપોર્ટ મેળવી વિદેશ પ્રવાસ કરનારા શખ્સ સામે ગુજરાત એટીએસ દ્વારા કાયદેસરનો ગુનો નોંધવામાં આવ્યો છે. મળતી માહિતી મુજબ આરોપી હરિકેશ પટેલ ગુજરાત મહિલા કોંગ્રેસ પ્રદેશ પ્રમુખ ગીતાબેન પટેલનો પુત્ર છે.

અમદાવાદના શાહીબાગ કેમ્પ રોડ પર મિરાપાર્ક સોસાયટી પાસે આવેલા ઉર્મી બંગલોઝમાં રહેતા હરીકેશ પ્રણવકુમાર પટેલ સામે ઈડી દ્વારા ચર્ચિત ‘પાવરબેંક એપ મની લોન્ડરિંગ કેસ’માં તપાસ ચાલી રહી છે. આ કેસની કાયદાકીય કાર્યવાહી દરમિયાન હરીકેશનો મૂળ ભારતીય પાસપોર્ટ તપાસ અધિકારી અને કોર્ટ સમક્ષ જમા કરાવી દેવામાં આવ્યો હતો. આ કેસમાં તેની આગોતરા જામીન અરજી ફગાવી દેવાયા બાદ તેણે હાઈકોર્ટમાં અરજી કરી હતી.

ધરપકડથી બચવા અને ગેરકાયદેસર રીતે વિદેશ પ્રવાસ કરવાના હેતુથી આરોપીએ એક યોજના બનાવી. તેણે દિલ્હી ક્રાઈમ બ્રાન્ચમાં એવી ખોટી ફરિયાદ નોંધાવી કે તેનો પાસપોર્ટ ખોવાઈ ગયો છે. આ સાથે તેણે દિલ્હી અને ઉત્તર પ્રદેશના આગ્રા ખાતે ખોટા રેન્ટલ એગ્રીમેન્ટ્સ તૈયાર કરાવી ત્યાંના રહેઠાણના બોગસ સરનામા ઊભા કર્યા હતા.

તપાસમાં બહાર આવ્યું છે કે આરોપીએ આગ્રાના બોગસ સરનામાનો ઉપયોગ કરીને ઓળખકાર્ડ સહિતના દસ્તાવેજો મેળવ્યા હતા. આ બનાવટી દસ્તાવેજોના આધારે તેણે ગાઝિયાબાદ સ્થિત રિજનલ પાસપોર્ટ ઓફિસમાં અરજી કરી હતી અને જુલાઈ ૨૬, ૨૦૨૪ ના રોજ નવો પાસપોર્ટ મેળવી લીધો હતો. આ પ્રક્રિયા દરમિયાન તેણે કોર્ટમાં પોતાનો પાસપોર્ટ જમા હોવાની બાબત છુપાવી રાખી હતી.