પતિને ખબર પડી તો ધડથી અલગ કરી દીધું યુવકનું માથું
આસામના જોરહાટ જિલ્લામાં પાડોશીની પત્ની સાથેના કથિત અફેરના વિવાદને લઈને ૩૧ વર્ષીય યુવકની હત્યાનો મામલો સામે આવ્યો છે. પોલીસે આ કેસમાં એક મહિલા સહિત ચાર આરોપીઓની ધરપકડ કરી છે. મૃતકની ઓળખ જોરહાટના મરિયાની વિસ્તારના ગ્રીનવ્યૂ ટી એસ્ટેટમાં રહેતા અનિલ રાજગઢ તરીકે થઈ છે.
પોલીસ સ્ટેશનમાં ફરિયાદ નોંધાવ્યા
પોલીસના જણાવ્યા અનુસાર, અનિલ ૭ સપ્ટેમ્બરના રોજ અચાનક ગુમ થયો હતો. પરિવારજનોએ મરિયાની પોલીસ સ્ટેશનમાં ફરિયાદ નોંધાવ્યા બાદ તપાસ શરૂ કરવામાં આવી હતી. ૧૧ સપ્ટેમ્બરના રોજ ભોગદોઈ નદી નજીકથી તેનો મૃતદેહ મળી આવ્યો હતો. ત્યારબાદ પોલીસે તપાસ આગળ વધારી અને શંકાસ્પદ લોકોની પૂછપરછ શરૂ કરી હતી. આ કેસમાં કપિલ કર્માકર, તેની પત્ની અનિમા કર્માકર, કપિલનો ભાઈ સંજીત કર્માકર અને તેમનો મિત્ર મહેશ રાજગઢની ધરપકડ કરવામાં આવી છે. પોલીસના જણાવ્યા અનુસાર, અનિલ છેલ્લા કેટલાક સમયથી અનિમાના સંપર્કમાં હતો. આરોપ છે કે ૭ સપ્ટેમ્બરના રોજ અનિમાએ અનિલને ચાના બગીચા વિસ્તારમાં બોલાવ્યો હતો, જ્યાં અન્ય આરોપીઓ પણ હાજર હતા.
ઘરેથી ઘટનામાં ઉપયોગમાં લેવાયેલું
પોલીસનો દાવો છે કે ત્યારબાદ અનિલ પર હુમલો કરવામાં આવ્યો અને તેની હત્યા કરવામાં આવી. તપાસ દરમિયાન એક આરોપીના ઘરેથી ઘટનામાં ઉપયોગમાં લેવાયેલું હોવાનું કહેવાતું હથિયાર પણ જપ્ત કરવામાં આવ્યું છે. પોલીસે આરોપીઓ સામે હત્યા, કાવતરું અને પુરાવા નષ્ટ કરવા સહિતની સંબંધિત કાયદાકીય જોગવાઈઓ હેઠળ કાર્યવાહી શરૂ કરી છે. પોસ્ટમોર્ટમ બાદ પોલીસે કેસમાં વધુ પુરાવા એકત્ર કરવાની પ્રક્રિયા હાથ ધરી છે. આરોપીઓ દ્વારા કથિત કબૂલાત કરવામાં આવી હોવાનો પોલીસનો દાવો છે, જોકે સમગ્ર મામલે કાનૂની કાર્યવાહી હજુ ચાલુ છે.
કલ્પેશ એન લીંબાસિયા
વિશ્વ સમાચાર રિપોર્ટર
