શું સાચે જ ખાટુ શ્યામ મંદિરમાં સિયા અને ચેતને કરી લીધા હતા ગુપ્ત લગ્ન?
પુણેના ચર્ચિત કેતન અગ્રવાલ મર્ડર કેસની તપાસ જેમ-જેમ આગળ વધી રહી છે, તેમ-તેમ ચોંકાવનારા ખુલાસા થઈ રહ્યા છે. હવે પોલીસ તપાસનો મુખ્ય વળાંક એ સવાલ પર આવીને અટક્યો છે કે શું આરોપી સિયા ગોયલ અને તેના કથિત પ્રેમી ચેતન ચૌધરીએ ડિસેમ્બર ૨૦૨૫ માં રાજસ્થાનના પ્રખ્યાત ખાટુ શ્યામ મંદિરમાં પરિવારથી છૂપી રીતે લગ્ન કરી લીધા હતા? પોલીસને તપાસ દરમિયાન બંનેની એક એવી તસવીર મળી છે, જેમાં તેઓ એકબીજા સાથે ગળામાં ફૂલોની માળા પહેરેલા જોવા મળી રહ્યા છે.
પુણે ગ્રામીણ પોલીસના જણાવ્યા અનુસાર, સિયા અને ચેતનના મોબાઈલ ફોન કોલ અને ચેટ્સના એનાલિસિસ દરમિયાન આ કથિત લગ્નની કડી મળી હતી. આ સુરાગના આધારે પોલીસ ટીમ તપાસ માટે રાજસ્થાનના ખાટુ શ્યામ મંદિર પહોંચી હતી. પોલીસે મંદિર પરિસરના સત્તાવાર રેકોર્ડ અને સીસીટીવી ફૂટેજ ખંગાળ્યા હતા, પરંતુ સત્તાવાર દસ્તાવેજ કે લગ્નનો કોઈ વીડિયો પુરાવો હાથ લાગ્યો ન હતો.
જોકે, તપાસ દરમિયાન મળેલી ફૂલોની માળા પહેરેલી તસવીરને પોલીસે કેસનો મહત્વનો પુરાવો ગણાવી ચાર્જશીટ સાથે કોર્ટમાં રજૂ કરી છે. આ તસવીરથી ગુપ્ત લગ્નની શંકા ચોક્કસપણે મજબૂત બની છે, પરંતુ તેનાથી કાયદાકીય પુષ્ટિ થતી નથી.
તપાસ અનુસાર, સિયા અને ચેતન ઓક્ટોબર ૨૦૨૫ થી એકબીજાના સંપર્કમાં હતા અને બંનેના પરિવારો આ સંબંધની વિરુદ્ધમાં હતા. ડિસેમ્બર ૨૦૨૫ માં બંને મિત્રો સાથે રાજસ્થાન ગયા હતા. આ જ સમયગાળા દરમિયાન સિયાના પરિવારજનો તેના માટે યોગ્ય મુરતિયાની શોધ કરી રહ્યા હતા અને બાદમાં કેતન અગ્રવાલ સાથે સિયાનું સગપણ નક્કી થઈ ગયું હતું.
૧૯ ફેબ્રુઆરી ૨૦૨૬ ના રોજ સિયા અને કેતનની સગાઈ થઈ હતી, જ્યારે નવેમ્બર માસમાં ઉદયપુરમાં લગ્ન યોજાવાના હતા. પરંતુ આ દરમિયાન પણ સિયા અને ચેતન વચ્ચે પ્રેમસંબંધ ચાલુ હતો. પોલીસે આક્ષેપ કર્યો છે કે કેતનને રસ્તામાંથી હટાવવા માટે જ બંનેએ મળીને આ ઘાતકી હત્યાનું ષડયંત્ર રચ્યું હતું.
હવે સૌથી મોટો સવાલ એ જ ઊભો થાય છે કે વરમાળા પહેરેલી આ તસવીર કયા પ્રસંગની છે? શું ખાટુ શ્યામ મંદિરમાં ખરેખર લગ્ન થયા હતા કે પછી આ તસવીર પાછળનું સત્ય કંઈક અલગ છે? કાયદાકીય રેકોર્ડના અભાવે આ સસ્પેન્સનો અંતિમ જવાબ પોલીસ તપાસ બાદ જ સ્પષ્ટ થશે.
કલ્પેશ એન લીંબાસિયા
વિશ્વ સમાચાર રિપોર્ટર
