ભારત અને પાકિસ્તાન વચ્ચે એશિયા કપની ફાઇનલમાં ઇતિહાસ સર્જાશે

એશિયા કપ ૨૦૨૫ માં ભારત અને પાકિસ્તાન વચ્ચે ૨૮ સપ્ટેમ્બરના રોજ દુબઈમાં ફાઇનલ રમાશે. આ સાથે જ એક નવો ઇતિહાસ સર્જાશે.

એશિયા કપ ૨૦૨૫માં ભારત અને પાકિસ્તાન વચ્ચે ૨૮ સપ્ટેમ્બરના રોજ દુબઈમાં ફાઇનલ રમાશે. આ સાથે જ એક નવો ઇતિહાસ સર્જાશે. એશિયા કપના ઇતિહાસમાં પ્રથમ વખત ભારત અને પાકિસ્તાન ફાઇનલમાં ટકરાશે. ટી ૨૦ ફોર્મેટ હોય કે વનડે ફોર્મેટ હોય ભારત અને પાકિસ્તાન આ ટૂર્નામેન્ટના ફાઇનલ મુકાબલામાં ક્યારેય એકબીજા સામે ટકરાયા નથી.

એશિયા કપની શરૂઆત ૧૯૮૪ માં થઇ હતી

એશિયા કપની આ ૧૭ મી સિઝન રમાશે. એશિયા કપની શરૂઆત ૧૯૮૪ માં થઇ હતી. તે સમયે આ ટૂર્નામેન્ટ સંયુક્ત આરબ અમીરાતમાં રમાઈ હતી, જેમાં ભારત સુનીલ ગાવસ્કરના નેતૃત્વમાં ચેમ્પિયન બન્યું હતું. આ ટૂર્નામેન્ટ વનડે અને ટી-૨૦ બંને ફોર્મેટમાં રમાય છે, જે વર્લ્ડ કપના ફોર્મેટ સાથે સુસંગત છે.

એશિયા કપમાં ભારત સૌથી વધારે ૮ વખત ચેમ્પિયન બન્યું

એશિયા કપમાં ભારત સૌથી વધારે વખત ચેમ્પિયન બન્યું છે. ટીમ ઇન્ડિયાએ વન-ડે ફોર્મેટમાં ૭ વખત અને ટી-૨૦ ફોર્મેટમાં એક વાર આ ટ્રોફી જીતી છે. એટલે કે કુલ ૮ વખત ચેમ્પિયન બન્યું છે. જ્યારે શ્રીલંકાએ વન-ડેમાં ૫ વખત અને ટી-૨૦ ફોર્મેટમાં એક વાર આ ટાઇટલ જીત્યું છે. એટલે કે તે ૬ વખત ચેમ્પિયન બન્યું છે. પાકિસ્તાન ૨ વખત ચેમ્પિયન બન્યું છે.