ગુજરાત શિક્ષણ બોર્ડ (જીએસઈબી)ની ધોરણ-૧૦ માટે વર્ષ ૨૦૨૬ ની પરીક્ષા ૨૬ ફેબ્રુઆરીથી ૧૬ માર્ચ દરમિયાન યોજાઈ હતી. જેમાં રાજ્યના ૧૫ લાખથી વધુ વિદ્યાર્થીઓએ પરીક્ષા આપી હતી. આમ ધોરણ-૧૦ (એસએસસી)નું પરિણામ આવતીકાલે એટલે કે ૬ મેના રોજ જીએસઈબી બોર્ડની સત્તાવાર વેબસાઈટ પર જાહેર કરવામાં આવશે.
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ(જીએસઈબી)ની ધોરણ-૧૦ અને સંસ્કૃત પ્રથમાની પરીક્ષા આપનારા લાખો વિદ્યાર્થીઓ માટે મહત્ત્વના સમાચાર સામે આવ્યા છે. બધુવારે(૬ મે) સવારે ૦૮:૦૦ વાગ્યે ધોરણ ૧૦ ની બોર્ડની પરીક્ષાનું પરિણામ જાહેર થશે.
વિદ્યાર્થીઓ અને વાલીઓ બોર્ડની સત્તાવાર વેબસાઇટ gseb.org પર જઈને વિદ્યાર્થીનો બેઠક ક્રમાંક નંબર દાખલ કરીને પરિણામ જોઈ શકાશે. વિદ્યાર્થીઓ પોતાનો બેઠક ક્રમાંક વોટ્સએપ નંબર ૬૩૫૭૩૦૦૯૭૧ પર મોકલીને પણ પોતાનું પરિણામ તરત જ મેળવી શકશે.
બોર્ડની અખબારી યાદી મુજબ, ગુણપત્રક અને પ્રમાણપત્ર શાળાઓમાં મોકલવા અંગેની સૂચનાઓ હવે પછી આપવામાં આવશે. જો કોઈ વિદ્યાર્થીને પરિણામ બાદ ગુણચકાસણી કરાવવી હોય તો તેના માટે ઓનલાઇન અરજી કરવાની રહેશે. આ ઉપરાંત, નામ સુધારા કે પૂરક પરીક્ષા ૨૦૨૬ માટેના ફોર્મ ભરવા અંગેની વિગતો પણ ટૂંક સમયમાં બોર્ડની વેબસાઇટ પર મૂકવામાં આવશે.
