ઇટાલીની મુલાકાત દરમિયાન, વડાપ્રધાન નરેન્દ્ર મોદીએ ઇટાલિયન પીએમ જ્યોર્જિયા મેલોનીને ‘મેલોડી’ ચોકલેટ ભેટમાં આપી હતી આ વીડિયો ઇટાલિયન પીએમએ પોતે ‘X’ પર શેર કર્યુ છે. પીએમ મોદીએ આપેલી આ ભેટનો વીડિયો સોશિયલ મીડિયા પર વાયરલ થઈ રહ્યો છે.
જ્યોર્જિયા મેલોની દ્વારા શેર કરાયેલા વીડિયોમાં, તે કહેતી સંભળાય છે કે, “વડાપ્રધાન મોદીએ મને ખૂબ જ સરસ ભેટ આપી છે, જે ખૂબ જ સારી ચોકલેટ છે.” આ પછી, પીએમ મોદી પોતે “મેલોડી” કહે છે, જેના પછી બંને નેતાઓ હસતા જોવા મળે છે.
અગાઉ, પીએમ મોદી જ્યોર્જિયા મેલોની સાથે રાત્રિભોજન પર મળ્યા હતા, ત્યારબાદ બંને નેતાઓએ કોલોઝિયમની મુલાકાત લીધી હતી. પીએમ મોદી અને જ્યોર્જિયા મેલોનીએ એક જ કારમાં સાથે મુસાફરી કરી હતી – જે દર્શાવે છે કે, ફરી એકવાર, પીએમ મોદીએ ઇટાલી સાથેના સંબંધોને મજબૂત બનાવવા માટે “કાર ડિપ્લોમસી”નો ઉપયોગ કર્યો.
‘X’ પર એક ફોટો શેર કરતા પીએમ મોદીએ લખ્યું: “રોમ પહોંચ્યા પછી, મને રાત્રિભોજન પર પ્રધાનમંત્રી મેલોનીને મળવાની તક મળી, ત્યારબાદ અમે પ્રતિષ્ઠિત કોલોસીયમની મુલાકાત લીધી. અમે વિવિધ વિષયો પર વિચારોનું આદાન-પ્રદાન કર્યું. હું આજે આપણી વાતચીત માટે આતુર છું, જે દરમિયાન આપણે ભારત-ઇટાલી મિત્રતાને વધુ મજબૂત બનાવવાના માર્ગો પર ચર્ચા કરવાનું ચાલુ રાખીશું.”
