૧૬ જુલાઈનું હવામાન: આગામી ૧૦ કલાકમાં બદલાશે વાતાવરણ, ૧૫ રાજ્યોમાં ભારે વરસાદ અને તેજ પવનની આગાહી
આવતીકાલે અષાઢી બીજે અમદાવાદ સહિત ઓડિશામાં અને દેશના અનેક વિસ્તારોમાં ભગવાન જગન્નાથજીની રથયાત્રા નીકળશે ત્યારે આવો જાણીએ કે કાલે હવામાનની સ્થિતિ શું હશે. દેશના અનેક ભાગોમાં ચોમાસું સક્રિય બનતું જઈ રહ્યું છે. હવામાન વિભાગે ૧૬ જુલાઈને ધ્યાનમાં રાખીને આગામી કલાકોમાં હવામાનમાં મોટા ફેરફારની શક્યતા વ્યક્ત કરી છે. આગામી ૧૦ કલાક દરમિયાન દેશના ૧૫ જેટલા રાજ્યોમાં વરસાદ, ગાજવીજ અને તેજ પવન ફૂંકાવાની સંભાવના છે. કેટલાક વિસ્તારોમાં પવનની ઝડપ ૬૦ કિલોમીટર પ્રતિ કલાક સુધી પહોંચી શકે છે. હવામાન વિભાગે લોકોને બહાર નીકળતા પહેલાં હવામાનની માહિતી તપાસવાની સલાહ આપી છે, જ્યારે દરિયાકાંઠાના વિસ્તારોમાં માછીમારોને સમુદ્રમાં ન જવા માટે સૂચના આપવામાં આવી છે.
હવામાન વિભાગના અનુમાન મુજબ દિલ્હી, ઉત્તર પ્રદેશ, બિહાર, રાજસ્થાન, મધ્ય પ્રદેશ, ઝારખંડ, પશ્ચિમ બંગાળ, સિક્કિમ, આસામ, હિમાચલ પ્રદેશ, ઉત્તરાખંડ, મેઘાલય, મણિપુર સહિત અનેક રાજ્યોમાં વરસાદની શક્યતા છે. કેટલાક વિસ્તારોમાં ભારે વરસાદ સાથે વીજળીના કડાકા અને તેજ પવન પણ ફૂંકાઈ શકે છે.
દિલ્હી અને એનસીઆરના નોઈડા, ગાઝિયાબાદ અને ગુરુગ્રામ સહિતના વિસ્તારોમાં ૧૬ થી ૨૦ જુલાઈ દરમિયાન વરસાદની શક્યતા છે. આ દરમિયાન લગભગ ૪૦ કિમી પ્રતિ કલાકની ઝડપે પવન ફૂંકાઈ શકે છે. જોકે હાલ કોઈ ખાસ ચેતવણી જાહેર કરવામાં આવી નથી.
ઉત્તર પ્રદેશમાં ૧૬ અને ૧૭ જુલાઈ દરમિયાન લખનૌ, ગોરખપુર, સીતાપુર, લખીમપુર ખીરી સહિત અનેક જિલ્લાઓમાં ભારે વરસાદની આગાહી કરવામાં આવી છે. ૩૦ થી ૪૦ કિમી પ્રતિ કલાકની ઝડપે ધૂળભરી આંધી પણ ફૂંકાઈ શકે છે. બિહારમાં ૧૬ થી ૨૦ જુલાઈ સુધી બેગુસરાય, દરભંગા, મુઝફ્ફરપુર, સમસ્તીપુર અને પૂર્વી ચંપારણ સહિતના વિસ્તારોમાં ભારે વરસાદની સંભાવના વ્યક્ત કરવામાં આવી છે. અહીં પણ આશરે ૪૦ કિમી પ્રતિ કલાકની ઝડપે પવન ફૂંકાવાની શક્યતા છે.
રાજસ્થાનના જોધપુર, બીકાનેર, શ્રીગંગાનગર, હનુમાનગઢ અને ચુરુ સહિતના વિસ્તારોમાં વરસાદ સાથે ધૂળભરી આંધી ફૂંકાઈ શકે છે. હવામાન વિભાગનું માનવું છે કે આ વરસાદથી ખરીફ પાકને લાભ મળી શકે છે. મધ્ય પ્રદેશના નર્મદાપુરમ, બૈતૂલ, જબલપુર, સતના, રીવા, છિંદવાડા સહિતના અનેક જિલ્લાઓમાં ૧૬ થી ૧૯ જુલાઈ દરમિયાન વરસાદ અને આંધી-તોફાનની સંભાવના છે. અહીં પવનની ઝડપ ૪૦ કિમી પ્રતિ કલાક સુધી પહોંચી શકે છે.
તમિલનાડુના કેટલાક જિલ્લાઓમાં ૧૬ જુલાઈએ વરસાદની શક્યતા છે, જ્યારે કેટલાક વિસ્તારોમાં ગરમી અને લૂ જેવી સ્થિતિ પણ રહી શકે છે. માછીમારોને દરિયામાં ન જવાની સલાહ આપવામાં આવી છે. કેરળમાં ૧૭ જુલાઈ બાદ હળવાથી મધ્યમ વરસાદની આગાહી કરવામાં આવી છે. તિરુવનંતપુરમ, કોચી, કોટ્ટાયમ અને પથનમથિટ્ટા સહિતના વિસ્તારોમાં ૩૦ થી ૪૦ કિમી પ્રતિ કલાકની ઝડપે પવન ફૂંકાઈ શકે છે. હવામાન વિભાગે તમામ અસરગ્રસ્ત વિસ્તારોના લોકોને સાવચેત રહેવા, હવામાનની સત્તાવાર માહિતી પર નજર રાખવા અને જરૂરિયાત વિના બહાર ન નીકળવાની અપીલ કરી છે.
