રામ મંદિર ટ્રસ્ટને નવા સીઈઓ મળ્યા

નિવૃત્ત એર માર્શલ જિતેન્દ્ર મિશ્રાના નામ પર લાગી અંતિમ મહોર

શ્રી રામ જન્મભૂમિ તીર્થ ક્ષેત્ર ટ્રસ્ટ માટે નવા ચીફ એક્ઝિક્યુટિવ ઓફિસર (સીઈઓ)ની જાહેરાત કરી દેવાઈ છે. નવા સીઈઓ તરીકે નિવૃત્ત એર માર્શલ જિતેન્દ્ર મિશ્રાના નામ પર અંતિમ મહોર લાગી ગઈ છે અને તેઓ ટૂંક સમયમાં મંદિર વહીવટની મુખ્ય જવાબદારીઓ સંભાળશે.

અયોધ્યામાં રામ જન્મભૂમિ તીર્થ ક્ષેત્ર ટ્રસ્ટ દ્વારા સીઈઓ ની સત્તાવાર જાહેરાત પહેલાં ટ્રસ્ટમાં ૩ નવા સભ્યોની નિમણૂક કરવામાં આવી છે. આ નવા સભ્યોમાં અયોધ્યાથી મદન મોહન પાંડે , દિલ્હીથી મહેશ ભાગચંદકા  અને શિકોહાબાદથી નિર્મલા યાદવ નો સમાવેશ થાય છે.

ચંપત રાય અને અનિલ મિશ્રા ના રાજીનામા તેમજ વિમલેન્દ્ર મોહન ના નિધન બાદ ટ્રસ્ટમાં ૩ પદો ખાલી પડ્યા હતા. નવા બનેલા ટ્રસ્ટીઓ પૈકી મહેશ ભાગચંદકા અશોક સિંઘલ ના સંબંધી છે, જ્યારે મદન મોહન પાંડે હાઈકોર્ટમાં મંદિર પક્ષ તરફથી વકીલ રહી ચૂક્યા છે. આ ત્રણેય નવા સભ્યો ટ્રસ્ટની બેઠકમાં ઓનલાઇન માધ્યમથી જોડાયા હતા.

બુધવારે મંદિરના પ્રથમ સીઈઓ ના નામની જાહેરાતને લઈને ટ્રસ્ટની મહત્વપૂર્ણ બેઠક યોજાઈ. બેઠક દરમિયાન નિવૃત્ત એર માર્શલ જિતેન્દ્ર મિશ્રા ની પસંદગી કરવામાં આવી છે.