અમેરિકા અને ચીન વચ્ચે લાંબા સમયથી ચાલી રહેલા વેપાર તણાવમાં અત્યારે થોડી નરમાઈ જોવા મળી છે. અમેરિકાના પ્રમુખ ડોનાલ્ડ ટ્રમ્પ અને ચીનના પ્રમુખ શી જિનપિંગ વચ્ચે વોશિંગ્ટનમાં થયેલી બેઠક બાદ બંને દેશોએ અંદાજે ૬૦ અબજ ડોલરના બિન-સંવેદનશીલ માલ પર ટેરિફ ઘટાડવા સંમતિ દર્શાવી છે. બંને દેશ આશરે ૩૦-૩૦ અબજ ડોલરના આયાતી માલમાં રાહત આપશે.
અમેરિકા તરફથી ચીનના ૭૭ પ્રકારના માલને નીચા ટેરિફ માટે પસંદ કરવામાં આવ્યા છે. તેમાં રમકડાં, નાના ઘરેલુ ઉપકરણો, વાસણો, શણગારની ચીજો અને બાળકો માટેની કેટલીક ચીજોનો સમાવેશ થાય છે. બીજી તરફ, ચીન અમેરિકાથી આવતાં કૃષિ ઉત્પાદનો, માંસ, દૂધની બનાવટો, દરિયાઈ ઉત્પાદનો, સૌંદર્યપ્રસાધનો અને તબીબી ઉપકરણો સહિત ૧૬૧૯ પ્રકારના માલને રાહત આપશે. ચીન અમેરિકાથી ૨૦૨૭ અને ૨૦૨૮ દરમિયાન દર વર્ષે ઓછામાં ઓછા ૧ કરોડ મેટ્રિક ટન કોલસો ખરીદવા પણ સંમત થયું છે. જોકે સોયાબીનને નવી ટેરિફ રાહતની યાદીમાં સામેલ કરવામાં આવ્યું નથી.
ટ્રેડ ટ્રુસ ૧૦ જાન્યુઆરી સુધી લંબાવાયો
બંને દેશોએ હાલના ટ્રેડ ટ્રુસને ૧૦ જાન્યુઆરી સુધી લંબાવવાનો નિર્ણય લીધો છે. આ સમયગાળા દરમિયાન વેપાર સંબંધિત મુદ્દાઓ પર વધુ વાટાઘાટો ચાલુ રહેશે. આ ઉપરાંત એઆઈ સંબંધિત કટોકટી માટે સંચાર વ્યવસ્થા, નાણાકીય સેવાઓમાં વધુ પ્રવેશ અને બંને દેશો વચ્ચેની સીધી ફ્લાઇટ વધારવા અંગે પણ સંમતિ થઈ છે. જોકે આ સંપૂર્ણ વેપાર સમજૂતી નથી. ચિપ્સ, ઇલેક્ટ્રિક વાહનો અને બેટરી જેવા વ્યૂહાત્મક ક્ષેત્રોને આ રાહતમાંથી બહાર રાખવામાં આવ્યા છે. તેથી અમેરિકા-ચીન વચ્ચેનો મૂળભૂત આર્થિક અને તકનીકી સ્પર્ધાનો તણાવ યથાવત્ છે.
કલ્પેશ એન લીંબાસિયા
વિશ્વ સમાચાર રિપોર્ટર
