કોંગ્રેસ સીએમ ના નિવેદન બાદ હોબાળો

રામ અમીરોનો ભગવાન અને મહાદેવ ગરીબોના…: કોંગ્રેસ સીએમ ના નિવેદન બાદ હોબાળો

તેલંગાણાના મુખ્યમંત્રી રેવંત રેડ્ડીના ભગવાન રામ અને ભગવાન શિવ અંગે કરેલા નિવેદનથી રાજકીય વિવાદ ઊભો થયો છે. સોમવારે એક મીડિયા કાર્યક્રમ દરમિયાન રેવંત રેડ્ડીએ ઉત્તર અને દક્ષિણ ભારતની રાજકીય તથા ધાર્મિક ઓળખની સરખામણી કરી હતી. આ દરમિયાન તેમણે ભાજપ દ્વારા ‘જય શ્રીરામ’ના નારા અંગે સવાલ ઉઠાવ્યો હતો. રેવંત રેડ્ડીએ કહ્યું કે દક્ષિણ ભારતના લોકો દ્રવિડ છે અને ઉત્તર ભારતના લોકો આર્ય છે. તેમણે દાવો કર્યો કે દક્ષિણ ભારતમાં લોકો ભગવાન શિવના ભક્ત છે, જ્યારે ઉત્તર ભારતમાં ભગવાન રામની ભક્તિ સાથે રાજકીય જોડાણ વધુ જોવા મળે છે.

‘શિવ ગરીબોના ભગવાન છે અને રામ અમીરોના ભગવાન છે.’ જોકે, તેમણે સાથે એવું પણ કહ્યું કે ભગવાન શિવ અને ભગવાન રામ બંને તેમના દેવતા છે. રેવંત રેડ્ડીએ ભાજપના નેતાઓ દ્વારા ‘જય શ્રીરામ’ના નારા લગાવવામાં આવતા હોવાનો ઉલ્લેખ કરીને સવાલ કર્યો કે તેઓ એ જ રીતે ‘હર હર મહાદેવ’નો નારો કેમ નથી લગાવતા.

કાર્યક્રમમાં રેવંત રેડ્ડીએ લોકસભા બેઠકોના સીમાંકન મુદ્દે પણ ચિંતા વ્યક્ત કરી હતી. તેમનો દાવો છે કે, જો લોકસભાની બેઠકોનું પુનઃવિતરણ મુખ્યત્વે વસ્તીના આધારે કરવામાં આવશે તો દક્ષિણ ભારતનાં રાજ્યોના રાજકીય મહત્વ પર તેની અસર પડી શકે છે. રામ અને શિવની સરખામણીનો સંદર્ભ પણ તેમણે ઉત્તર અને દક્ષિણ ભારતની અલગ રાજકીય તથા સાંસ્કૃતિક ઓળખ સમજાવવા માટે આપ્યો હતો.

રેવંત રેડ્ડીના નિવેદન સામે ભાજપે આકરી પ્રતિક્રિયા આપી છે. કેન્દ્રીય મંત્રી બાંદી સંજય કુમારે આરોપ લગાવ્યો કે રેવંત રેડ્ડી ભગવાન રામ અને ભગવાન શિવ વચ્ચે રાજકીય વિભાજન ઊભું કરવાનો પ્રયાસ કરી રહ્યા છે. રામ અને શિવને ઉત્તર અને દક્ષિણ અથવા અમીર અને ગરીબના આધારે અલગ કરવા જોઈએ નહીં. તેમણે વડાપ્રધાન નરેન્દ્ર મોદીના કાશી વિશ્વનાથ મંદિર સાથેના જોડાણનો ઉલ્લેખ કરતાં રેવંત રેડ્ડીના એ સવાલનો વિરોધ કર્યો કે ભાજપના નેતાઓ ભગવાન શિવનું નામ લેતા નથી. તેમણે તેલંગાણાના વેમુલાવાડા અને ભદ્રાચલમ જેવા ધાર્મિક સ્થળોનો પણ ઉલ્લેખ કર્યો.

 

કલ્પેશ એન લીંબાસિયા

વિશ્વ સમાચાર રિપોર્ટર