પ્રેમાનંદ મહારાજની તબિયત લથડી -

પદયાત્રા અનિશ્ચિત સમય માટે સ્થગિત; ભક્તો ચિંતાતુર

પ્રેમાનંદ મહારાજ દરરોજ સવારે કેલી કુંજ આશ્રમથી સૌભરી કુંડ સુધી દોઢ કિલોમીટર ચાલીને જાય છે. પ્રેમાનંદ મહારાજના લાખો અનુયાયીઓ છે, જેમા વિરાટ કોહલીથી લઇ હેમા માલિની સહિત ઘણા જાણીતા લોકો સામેલ છે.

વૃંદાવનના પ્રસિદ્ધ સંત પ્રેમાનંદ મહારાજની તબિયત ફરી એકવાર બગડી છે. આ કારણે તેમની પદયાત્રા અનિશ્ચિત સમય માટે સ્થગિત કરવામાં આવી છે. એટલું જ નહીં, તેમના દર્શન પણ અટકાવી દેવામાં આવ્યા છે. આ સમાચાર બાદ લાખો ભક્તો અને અનુયાયીઓ ચિંતાતુર છે.

રવિવારે મોડી રાત્રે મોટી સંખ્યામાં શ્રદ્ધાળુઓ વૃંદાવન પહોંચ્યા હતા, પરંતુ પ્રેમાનંદ મહારાજ રાબેતા મુજબ સવારે ૦૩:૦૦ વાગ્યે પદયાત્રા માટે નીકળ્યા ન હતા. આશ્રમ માંથી તેમના શિષ્યો તેમના સ્થળે આવ્યા હતા અને લાઉડસ્પીકર દ્વારા ભક્તોને આ વિશે જાણ કરી હતી.

શિષ્યોએ કહ્યું કે, પ્રેમાનંદ મહારાજજીની અસ્વસ્થતાના કારણે આજથી પદયાત્રા મુલતવી રાખવામાં આવી રહી છે. ભક્તોને અપીલ કરવામાં આવી હતી કે તેઓ રસ્તાની બાજુમાં ભીડ ન કરે અને વ્યવસ્થા જાળવી રાખે. આ ઘોષણા બાદ શ્રદ્ધાળુઓને દર્શન કર્યા વગર પરત ફરવું પડ્યું હતું. આશ્રમ સાથે સંકળાયેલા લોકોએ જણાવ્યું હતું કે મહારાજજી છેલ્લા ૨૧ વર્ષથી કિડનીની ગંભીર બીમારી સામે લડી રહ્યા છે. અચાનક તબિયત બગડવાને કારણે ડોક્ટરની સલાહ પર તેમને આરામ આપવામાં આવી રહ્યો છે.

પદયાત્રા અનિશ્ચિત સમય માટે સ્થગિત

આશ્રમે હજુ સુધી પ્રેમાનંદ મહારાજની પદયાત્રા અને દર્શન ફરી શરૂ થવા વિશે કોણ જાણકારી આપી નથી. પ્રેમાનંદ મહારાજ દરરોજ સવારે કેલી કુંજ આશ્રમથી સૌભરી કુંડ સુધી દોઢ કિલોમીટર ચાલે છે. પ્રેમાનંદ મહારાજ માત્ર આધ્યાત્મિક ક્ષેત્રમાં જ નહીં પરંતુ સોશિયલ મીડિયા પર પણ ખૂબ જ લોકપ્રિય છે.

પ્રેમાનંદ મહારાજના સોશિયલ મીડિયા પર લાખો ફોલોઅર્સ

તેમના યુટ્યુબ પર લગભગ ૭૬ લાખ, ઇન્સ્ટાગ્રામ પર ૨૪ લાખ અને ફેસબુક પર ૧૦ લાખથી વધુ ફોલોઅર્સ છે. ક્રિકેટર વિરાટ કોહલી અને અભિનેત્રી અનુષ્કા શર્માની સાથે આશુતોષ રાણા, હેમા માલિની, મીકા સિંહ અને અન્ય ઘણી જાણીતી હસ્તીઓ પણ તેમના ફોલોઅર્સ હોવાનું કહેવાય છે.

પ્રેમાનંદ મહારાજનો જન્મ ક્યાં થયો હતો?

પ્રેમાનંદ મહારાજનો જન્મ ઉત્તરપ્રદેશના કાનપુર જિલ્લાના નરવાલ તાલુકાના અખરી ગામમાં થયો હતો. તેમના પિતાનું નામ શંભુ નારાયણ પાંડે અને માતાનું નામ રમા દેવી હતું. પ્રેમાનંદ ત્રણ ભાઈઓમાં વચલા હતા. તેઓ બાળપણથી જ આધ્યાત્મિક હતા અને આઠમા ધોરણ સુધી અભ્યાસ કરતો હતો. તેમણે ગુરુ ગૌરી શરણજી મહારાજ પાસેથી દીક્ષા મેળવી હતી.