પુરાવાના અભાવે અમેરિકામાં ગૌતમ અદાણી સામેના તમામ ક્રિમિનલ કેસ કાયમી ધોરણે બંધ
ભારતીય ઉદ્યોગજગત અને અદાણી જૂથ માટે અમેરિકાથી બહુ મોટા રાહતના સમાચાર આવ્યા છે. અદાણી ગ્રુપના ચેરમેન ગૌતમ અદાણી અને તેમના ભત્રીજા સાગર અદાણી સામે અમેરિકામાં ચાલી રહેલા બહુચર્ચિત કાનૂની મામલામાં અમેરિકી ન્યાય વિભાગેતમામ ગુનાહિત આરોપો કાયમી ધોરણે પાછા ખેંચી લીધા છે. ન્યૂયોર્કની કોર્ટમાં સત્તાવાર દસ્તાવેજો રજૂ કરીને અમેરિકી ન્યાય વિભાગે સ્પષ્ટ કર્યું છે કે તેઓ આ બાબતે આગળ કોઈ કાનૂની પ્રક્રિયા કરવા કે સંસાધનો ખર્ચવા માંગતા નથી. કોર્ટે આ કેસને ‘વિથ પ્રિજુડિસ’ રદ કર્યો છે, જેનો અર્થ એ થાય છે કે ભવિષ્યમાં પણ આ કેસને ફરી ક્યારેય ખોલી શકાશે નહીં. આ મોટા ઘટનાક્રમને પગલે અદાણી ગ્રુપ પરથી કાનૂની સંકટના વાદળો સંપૂર્ણપણે હટી ગયા છે.
વર્ષ ૨૦૨૪ના અંતમાં અમેરિકી તપાસ એજન્સીઓ દ્વારા અદાણી જૂથ પર ગંભીર આરોપો મૂકવામાં આવ્યા હતા. આરોપ હતો કે, ભારતમાં સોલાર એનર્જી (સૌર ઊર્જા)ના મોટા કોન્ટ્રાક્ટ મેળવવા માટે અદાણી ગ્રુપે અંદાજે ૨૬.૫ કરોડ ડોલર (આશરે ૨૬૫ મિલિયન યુએસ ડોલર)ની લાંચ આપવાની યોજના બનાવી હતી. એટલું જ નહીં, આ બાબત અમેરિકી રોકાણકારો અને ધિરાણકર્તાઓથી છુપાવીને ભંડોળ એકત્ર કરવામાં આવ્યું હોવાનો દાવો પણ કરાયો હતો. જોકે, તપાસ દરમિયાન અમેરિકી એજન્સીઓને અદાલતમાં ટકી શકે તેવા કોઈ નક્કર પુરાવા મળ્યા નહોતા અને આ કેસમાં કોઈ ‘સ્પષ્ટ અમેરિકી લિંક’ પણ સાબિત થઈ શકી નહોતી.
કેસ પડતો મૂકતાં અમેરિકી ન્યાય વિભાગે કોર્ટમાં જણાવ્યું હતું કે, “ન્યાય વિભાગે આ સમગ્ર કેસની ઝીણવટભરી સમીક્ષા કરી છે. પ્રોસિક્યુટોરિયલ ડિસ્ક્રિશન (અભિયોજન વિવેકાધિકાર) હેઠળ એવો નિર્ણય લેવામાં આવ્યો છે કે વ્યક્તિગત પ્રતિવાદીઓ સામેના આ ફોજદારી આરોપો પાછળ હવે વધુ સંસાધનો કે સમય બગાડવામાં આવશે નહીં.” ન્યાય વિભાગના આ વલણ બાદ કોર્ટે તમામ આરોપો કાયમી ધોરણે ફગાવી દીધા છે.
અમેરિકી શેરબજારના નિયમનકાર એસઈસી (સિક્યોરિટીઝ એન્ડ એક્સચેન્જ કમિશન) દ્વારા રોકાણકારોને આપવામાં આવેલી માહિતી સંબંધિત સિવિલ (નાગરિક) કેસનો પણ શાંતિપૂર્ણ નિકાલ કરવામાં આવ્યો છે. કોર્ટના દસ્તાવેજો અનુસાર, ગૌતમ અદાણી ૬૦ લાખ ડોલર અને સાગર અદાણી ૧.૨ કરોડ ડોલર ચૂકવવા સંમત થયા છે. ખાસ વાત એ છે કે, આ નાણાકીય પતાવટમાં બંનેમાંથી કોઈએ પણ પોતાની તરફથી કોઈ પણ પ્રકારની ભૂલ કે ગેરરીતિ સ્વીકારી નથી.
અમેરિકામાંથી મળેલા આ ઐતિહાસિક વિજયના સમાચાર વહેતા થતાં જ આજે ભારતીય શેરબજારમાં અદાણી ગ્રુપના શેરોમાં જોરદાર તેજી જોવા મળી હતી. ફ્લેગશિપ કંપની અદાણી એન્ટરપ્રાઇઝિસ અને અદાણી પોર્ટ્સ સહિત ગ્રુપની તમામ કંપનીઓના શેરો રોકેટ ગતિએ વધ્યા હતા, જેના કારણે રોકાણકારોની સંપત્તિમાં કરોડો રૂપિયાનો જંગી ઉમેરો થયો છે. બજારના નિષ્ણાતોના મતે, આ કાનૂની ક્લીનચીટ બાદ અદાણી ગ્રુપના વૈશ્વિક બિઝનેસ વિસ્તરણને હવે નવી પાંખો મળશે.
