ક્રિકેટ જગતમાં આગામી દિવસોમાં બહુ મોટા અને ચોંકાવનારા ફેરફારો જોવા મળી શકે છે. ઇન્ટરનેશનલ ક્રિકેટ કાઉન્સિલ ક્રિકેટ રમવાના નિયમોમાં એવા ધરખમ ફેરફારો કરવાની તૈયારી કરી રહ્યું છે, જેણે રમત જગતમાં ભારે હલચલ મચાવી દીધી છે. સૌથી મોટો અને આશ્ચર્યજનક પ્રસ્તાવ ટેસ્ટ ક્રિકેટને લઈને છે, જ્યાં હવે એક જ મેચ દરમિયાન લાલ અને ગુલાબી બોલ બંનેનો ઉપયોગ જોવા મળી શકે છે. આ સિવાય વનડેમાં કોચની મેદાન પર એન્ટ્રી અને ટી૨૦ના બ્રેક ટાઇમમાં ઘટાડો કરવા જેવા ૪ મોટા નિયમો લાઈનમાં છે.
તમામ પ્રસ્તાવો પર આગામી ૩૦ મે ૨૦૨૬ ના રોજ અમદાવાદમાં યોજાનારી આઈસીસી બોર્ડ મીટિંગમાં અંતિમ મંજૂરી મળી શકે છે. આ નવા નિયમો ૧ ઓક્ટોબર ૨૦૨૬ થી આંતરરાષ્ટ્રીય ક્રિકેટમાં સત્તાવાર રીતે લાગુ કરવામાં આવશે. આ પ્રસ્તાવો પર આઈસીસી ચીફ એક્ઝિક્યુટિવ્સ કમિટીની વર્ચ્યુઅલ મીટિંગમાં ચર્ચા થઈ ચૂકી છે, જેમાં ક્રિકેટ કમિટીના ચેરમેન સૌરવ ગાંગુલી પણ સામેલ હતા.
