વૈભવે મેદાન ધ્રૂજાવ્યું

વૈભવની આ આક્રમક બેટિંગ અહીં જ ન અટકી, તેણે માત્ર ૧૧ બોલમાં પોતાની અડધી સદી પૂરી કરી લીધી હતી, જેમાં ૫ છગ્ગા અને ૫ ચોગ્ગા સામેલ હતા. વૈભવ સૂર્યવંશી કમનસીબે પોતાની સદી ચૂકી ગયો હતો અને ૨૯ બોલમાં ૯૪ રનની વિસ્ફોટક ઈનિંગ રમીને આઉટ થયો હતો. આ ઈનિંગ દરમિયાન તેનો સ્ટ્રાઈક રેટ ૩૨૪ નો હતો અને તેણે કુલ ૧૦ ચોગ્ગા તથા 8 છગ્ગા ફટકાર્યા હતા. તેને શ્રીલંકન કેપ્ટન સહાન અરાચિગેએ આઉટ કર્યો હતો. વૈભવ જ્યારે આઉટ થયો ત્યાં સુધીમાં ભારત-એ ટીમના 2 વિકેટ પડી ચૂકી હતી. 

ટ્રાઈ સિરીઝની વાત કરીએ તો, ભારતીય ટીમ ૪ પોઈન્ટ સાથે પોઈન્ટ ટેબલમાં બીજા ક્રમે રહીને ફાઈનલમાં પ્રવેશી હતી, જ્યારે શ્રીલંકા-એ ૬ પોઈન્ટ સાથે ટેબલ ટોપર તરીકે ફાઈનલમાં પહોંચી હતી. આ ટુર્નામેન્ટમાં બંને ટીમો ત્રીજીવાર સામસામે છે. આ પહેલા રમાયેલી બે મેચોમાં બંને ટીમો ૧-૧ થી બરાબરી પર હતી.

આ મેચમાં વૈભવ સૂર્યવંશી અલગ જ મૂડમાં મેદાન પર ઉતર્યો હતો. તેણે શ્રીલંકન બોલરોની લાઇન અને લેન્થ સંપૂર્ણપણે બગાડી નાખી હતી. વૈભવે માત્ર ૧૧ બોલમાં પોતાની અડધી સદી પૂરી કરી લીધી હતી. સૌથી આશ્ચર્યજનક વાત એ છે કે, અડધા સદીના આંકડા સુધી પહોંચવા માટે તેણે એક પણ સિંગલ રન લીધો ન હતો! 

વૈભવ સૂર્યવંશી હવે લિસ્ટ-એ (List-A) ક્રિકેટના ઇતિહાસમાં સૌથી ઝડપી અડધી સદી ફટકારનાર વિશ્વનો પ્રથમ બેટર બની ગયો છે. આ સાથે જ તેણે શ્રીલંકાના કૌશલ્યા વીરારત્નેનો ૨૦ વર્ષ જૂનો રેકોર્ડ તોડી નાખ્યો છે. વીરારત્નેએ ૧ નવેમ્બર ૨૦૦૫ ના રોજ રાગામા ક્રિકેટ ક્લબ તરફથી રમતા કુરુનેગલા યુથ ક્રિકેટ ક્લબ સામે માત્ર ૧૨ બોલમાં ફિફ્ટી ફટકારી હતી. વૈભવે આ રેકોર્ડ તોડીને માત્ર ૧૧ બોલમાં કારનામો કરી બતાવ્યો છે.

વૈભવે મુંબઈના સ્ટાર બેટર સરફરાઝ ખાનના નામે રહેલો ભારતીય રેકોર્ડ પણ તોડી નાખ્યો છે. સરફરાઝ ખાને વિજય હઝારે ટ્રોફીની ગત સીઝનમાં પંજાબ સામે માત્ર ૧૫ બોલમાં અડધી સદી ફટકારી હતી, જેને વૈભવે આસાનીથી પાછળ છોડી દીધી છે.

વૈભવ સૂર્યવંશી આ મેચમાં થોડો અનલકી પણ રહ્યો હતો અને શતકથી માત્ર ૬ રન દૂર રહી ગયો હતો. તેણે માત્ર ૨૯ બોલનો સામનો કરીને ૩૨૪.૧૪ ના વિસ્ફોટક સ્ટ્રાઈક રેટ સાથે ૯૪ રન બનાવ્યા હતા, જેમાં ૧૦ ચોગ્ગા અને ૮ છગ્ગા સામેલ હતા. વૈભવ જો સદી પૂરી કરી લેત, તો તે લિસ્ટ-એ ક્રિકેટમાં સૌથી ઝડપી સદીના વર્લ્ડ રેકોર્ડની બરાબરી કરી લેત.

હાલમાં લિસ્ટ-એ ક્રિકેટમાં સૌથી ઝડપી સદીનો રેકોર્ડ ઓસ્ટ્રેલિયાના જેક ફ્રેઝર-મેકગર્કના નામે છે, જેણે ઓક્ટોબર ૨૦૨૩ માં સાઉથ ઓસ્ટ્રેલિયા તરફથી રમતા તાસ્માનિયા સામે માત્ર ૨૯ બોલમાં સદી ફટકારી હતી.