બ્રિટિશ વડાપ્રધાન કીર સ્ટાર્મરે આ ભેટ વિશે સૌથી પહેલા વાત કરતા જણાવ્યું કે, તેમને અને અન્ય નેતાઓને તેમના નામ કોતરેલી રિવોલ્વર મળી છે. તેની સાથે એક ક્લીનિંગ કીટ અને ૫૦૦ ગોળીઓ પણ અપાઈ હતી. સ્પેનના વડાપ્રધાન પેડ્રો સાંચેઝ અને સ્લોવાકિયાના રાષ્ટ્રપ્રમુખ પીટર પેલેગ્રીનીએ પણ આ અણધારી ગિફ્ટ મળવાની પુષ્ટિ કરી હતી. જ્યારે કેનેડાના વડાપ્રધાન માર્ક કાર્નીએ મજાકમાં કહ્યું કે, ‘તેમની મેપલ સિરપની ભેટ તુર્કીની આ રિવોલ્વર સામે સાવ ફીકી પડી ગઈ.’

આ ભેટના કારણે વિવિધ દેશોની સુરક્ષા ટીમો અને એરપોર્ટ પર ભારે મૂંઝવણ ઊભી થઈ હતી. બેલ્જિયમના વડાપ્રધાને પોતાની રિવોલ્વર બ્રસેલ્સ એરપોર્ટ પોલીસને સોંપી દીધી હતી, જ્યારે પોલેન્ડના રાષ્ટ્રપ્રમુખની ગિફ્ટ કસ્ટમ ક્લિયરન્સની રાહ જોઈ રહી હતી. નેધરલેન્ડ અને સ્વીડનના વડાપ્રધાનોએ આ હથિયાર તુર્કીમાં આવેલી તેમની એમ્બેસીમાં મોકલી આપ્યા હતા.

ઇટાલીના વડાપ્રધાન જ્યોર્જિયા મેલોનીએ આ રિવોલ્વર સરકારી હેડક્વાર્ટરમાં અન્ય સરકારી ભેટો સાથે સુરક્ષિત રાખી દીધી છે. બીજી તરફ, યુરોપિયન કમિશનના અધ્યક્ષ ઉર્સુલા વોન ડેર લેયેન અને ગ્રીસના નેતાએ આ રિવોલ્વર પોતપોતાના દેશના સૈન્ય અને યુદ્ધ મ્યુઝિયમને દાન આપવાની યોજના બનાવી છે.

સામાન્ય રીતે આવી વૈશ્વિક સભાઓમાં હથિયારોની ભેટ અપાતી નથી, કારણ કે તેમાં કડક સુરક્ષા તપાસની જરૂર પડે છે. જોકે, તુર્કીના હથિયાર નિર્માતાઓએ સસ્તા દરની પિસ્તોલ અને શૉટગન સાથે યુરોપના બજારમાં મજબૂત પકડ બનાવી લીધી છે. વર્ષ ૨૦૧૯ થી ૨૦૨૪ વચ્ચે નાના હથિયારોની નિકાસમાં અમેરિકા અને ઇટાલી પછી તુર્કી અંદાજે ૩ બિલિયન ડોલરના નિકાસ સાથે વિશ્વમાં ત્રીજા ક્રમે રહ્યું છે.