બટાકા અને તેની છાલનો ઉપયોગ કરવાની ૮ સ્માર્ટ રીત

બટાકા માત્ર વાનગી જ નહીં પણ ઘરની સફાઇ અને સ્ક્રીન કેર અને બાગકામમાં પણ બહુ ઉપયોગી છે. અહીં બટાકા અને બટાકાની છાલનો ઉપયોગ કરવાની ૮ સ્માર્ટ રીત જણાવી છે.

બટાકા એક શાકભાજી છે, જેને રસોડાનો રાજા કહેવામાં આવે છે. બટાકા આખું વર્ષ સરળતાથી ઉપલબ્ધ થાય તેવી શાકભાજી છે. બટાકા અન્ય કોઇ શાકભાજીમાં સરળતાથી ભળી જાય છે. પણ શું તમે જાણો છો કે બટાકા અને તેની છાલ માત્ર શાક બનાવવા સિવાય પણ ઘણી અદ્ભુત રીતે ઉપયોગમાં આવી શકે છે? અહીં બટાકા અને તેની છાલનો ઉપયોગ કરવાની કેટલીક સ્માર્ટ રીતો જણાવી છે:

બટાકાનો સ્માર્ટ ઉપયોગ

શાકમાં મીઠું ઓછું કરવા

જો ક્યારેર શાક કે દાળમાં મીઠું વધારે પડી જાય, તો બટાકાના મોટા ટુકડા કરીને તેમાં નાખી દો. બટાકા વધારાનું મીઠું શોષી લેશે.

ત્વચાની સંભાળ

બટાકાનો રસ આંખના ડાર્ક સર્કલ અને ત્વચા પરના ડાઘ દૂર કરવાનો ઘરેલું ઉપાય છે. બટાકાની સ્લાઈસને આંખો પર રાખવાથી થાક દૂર થાય છે અને ઠંડક મળે છે.

કાચ સાફ કરવો

અરીસો કે બારીના કાચ પર ડાઘ પડી ગયા હોય, તો કાચા બટાકાનો ટુકડો તેના પર ઘસો અને પછી સૂકા કપડાથી લૂછી લો. કાચ ચમકી જશે.

ચાંદીના વાસણો કે ઘરેણાં ચમકાવવા

બટાકાના બાફેલા પાણીને ફેંકી દેવાને બદલે, તેમાં ચાંદીના વાસણો કે ઘરેણાં થોડીવાર પલાળી રાખો અને પછી બ્રશથી સાફ કરી લો. તે સરસ ચમકી જશે.

બટાકાની છાલનો સ્માર્ટ ઉપયોગ

મોટાભાગે આપણે બટાકાની છાલને કચરો સમજીને ફેંકી દઈએ છીએ, પણ તે ખૂબ જ ઉપયોગી છે:

ક્રિસ્પી ચિપ્સ

બટાકાની છાલને બરાબર ધોઈ લો. તેના પર થોડું તેલ, મીઠું, હળદર અને મરચું અથવા પેપ્રિકા મિક્સ કરીને ઓવનમાં બેક કરો અથવા એર-ફ્રાય કરો. એકદમ ટેસ્ટી અને ક્રિસ્પી ચિપ્સ તૈયાર થઈ જશે.

છોડ માટે જૈવિક ખાતર

બટાકાની છાલમાં પોટેશિયમ, નાઈટ્રોજન અને અન્ય પોષક તત્વો ભરપૂર હોય છે. તેને કુંડાની માટીમાં દબાવી દેવાથી અથવા પાણીમાં ઉકાળી, તે પાણી છોડમાં નાખવાથી છોડનો વિકાસ સારો થાય છે.

વાસણોની ચીકાશ દૂર કરવા

લોખંડના તવા કે કડાઈમાં કાટ અથવા ચીકાશ જામી ગઈ હોય, તો બટાકાની છાલ પર થોડું મીઠું છાંટીને વાસણ પર ઘસવાથી વાસણ એકદમ સાફ થઈ જાય છે.

સફેદ વાળ માટે નેચરલ ડાઈ

બટાકાની છાલને પાણીમાં બરાબર ઉકાળી લો. એ પાણી ગાળીને ઠંડુ થવા દો. વાળ ધોયા પછી આ પાણીથી વાળ સરસ રીતે ધોઈ લો. નિયમિત આવું કરવાથી સફેદ થતા વાળ કુદરતી રીતે કાળા થવા લાગે છે.