જૂનના છેલ્લા સપ્તાહમાં વાંગે બ્રિક્સના રાષ્ટ્રીય સુરક્ષા સલાહકારોની બેઠક માટે ભારત આવ્યા હતા અને અજીત ડોભાલ સાથે મુલાકાત કરી હતી.
ચીનના રાષ્ટ્રપતિ શી જિનપિંગ આવતા મહિને બ્રિક્સ નેતાઓની સમિટ માટે ભારતની મુલાકાતે આવે તેવી સંભાવના છે. આ દરમિયાન રાષ્ટ્રીય સુરક્ષા સલાહકાર અજિત ડોભાલ સોમવારે બેઇજિંગ જઈ રહ્યા છે. ત્યાં તેઓ તેમના ચીની સમકક્ષ વાંગ યી સાથે સરહદ મુદ્દે વિશેષ પ્રતિનિધિ સ્તરની વાતચીત કરશે.
મંગળવારે સીમા વાટાઘાટોનો ૨૫ મો રાઉન્ડ યોજાશે. ડોભાલ અને વાંગ બંનેને સરહદ વાટાઘાટોના પ્રતિનિધિ તરીકે નિયુક્ત કરવામાં આવ્યા છે, જેની સ્થાપના વર્ષ ૨૦૦૩ માં બંને દેશો વચ્ચે લાંબા સમયથી ચાલતા સરહદ વિવાદને ઉકેલવા માટે કરવામાં આવ્યા હતા.
જૂનના છેલ્લા સપ્તાહમાં વાંગે બ્રિક્સના રાષ્ટ્રીય સુરક્ષા સલાહકારોની બેઠક માટે ભારત આવ્યા હતા અને અજીત ડોભાલ સાથે મુલાકાત કરી હતી. વાંગે ભારપૂર્વક જણાવ્યું હતું કે ભારત અને ચીન માટે એકબીજાના મૂળ હિતોનું સન્માન કરવું અને બંને પક્ષો દ્વારા હાંસલ કરાયેલી સર્વસંમતિને અમલમાં મૂકવા માટે નક્કર પગલાં લેવા મહત્વપૂર્ણ છે.
ભારત ચીન સંબંધો પર અસર
ઉલ્લેખનીય છે કે, પૂર્વી લદ્દાખમાં વાસ્તવિક નિયંત્રણ રેખા (LAC) પર સૈન્ય ગતિરોધ બાદ ભારત ચીન સંબંધો ખરાબ રીતે બગડ્યા હતા, પરંતુ હવે તેઓ આ સંબંધોને સુધારવાના પ્રયાસો કરી રહ્યા છે. ૨૦૨૪ ના અંતથી, બંને પક્ષોએ તણાવ ઘટાડવા માટે પગલાં લીધાં છે. ગયા વર્ષે દિલ્હીમાં વાંગ સાથે મુલાકાત બાદ ડોભાલે કહ્યું હતું કે ભારત-ચીન સરહદ પર શાંતિ અને સુલેહ જાળવી રાખવામાં આવી છે અને દ્વિપક્ષીય સંબંધોમાં સકારાત્મક વલણ છે.
આ મહિનાની શરૂઆતમાં LAC પર તણાવના અહેવાલો અંગેના એક પ્રશ્નના જવાબમાં વિદેશ મંત્રાલયે કહ્યું હતું કે ચીન સાથેની સરહદની સ્થિતિ વ્યાપક દ્વિપક્ષીય સંબંધોની સ્થિતિને પ્રતિબિંબિત કરશે અને એલએસી પર શાંતિ અને સુલેહ જાળવવી ખૂબ જ મહત્વપૂર્ણ છે.
વિદેશ મંત્રાલયના પ્રવક્તા રણધીર જયસ્વાલે પણ ચીન દ્વાા અરુણાચલ પ્રદેશમાં ૨૭ સ્થળો અને ખાસિયતોને તેમના નામ સાથે ઓળખવા બદલ ભારતની ટીકા પર વાંધો ઉઠાવ્યો હતો. તેમણે કહ્યું કે રાજ્ય ભારતનું અવિભાજ્ય અને અભિન્ન અંગ છે અને આ નિર્વિવાદ વાસ્તવિકતાને કોઈ બદલી શકશે નહીં.
કલ્પેશ એન લીંબાસિયા
વિશ્વ સમાચાર રિપોર્ટર
