આઠ રાજ્યોની હાઈકોર્ટમાં નવા ચીફ જસ્ટિસની નિમણૂક

કેન્દ્ર સરકારે કોલેજિયમની ભલામણોને આપી મંજૂરી

સુપ્રીમ કોર્ટ કોલેજિયમની ભલામણના આધારે કેન્દ્ર સરકારે ૮ રાજ્યોની હાઈકોર્ટમાં નવા મુખ્ય ન્યાયાધીશોની નિમણૂક કરી છે. કાયદા મંત્રીએ X પર આ માહિતી આપી હતી.

કેન્દ્ર સરકારે શનિવારે એક મોટો નિર્ણય લીધો છે અને દેશના આઠ જુદા જુદા રાજ્યોની હાઈકોર્ટમાં નવા મુખ્ય ન્યાયાધીશોની નિમણૂક કરી છે. સુપ્રીમ કોર્ટ કોલેજિયમે તેની ભલામણો મોકલ્યાના થોડા દિવસો પછી જ આ નિર્ણય લેવામાં આવ્યો છે, અને કોલેજિયમની ભલામણોને મંજૂરી આપવામાં આવી છે.

આ સંદર્ભે કેન્દ્રીય કાયદા પ્રધાન અર્જુન રામ મેઘવાલે સોશિયલ મીડિયા પ્લેટફોર્મ X પર એક પોસ્ટ કરી હતી અને તેના દ્વારા આ તમામ નવી નિમણૂકોની સત્તાવાર માહિતી શેર કરી હતી. આ નવા ફેરફારથી અનેક રાજ્યોની હાઈકોર્ટમાં નવા મુખ્ય ન્યાયાધીશોની નિમણૂક કરવામાં આવી છે.

રાજસ્થાન હાઈકોર્ટમાં મોટા ફેરફારો

છત્તીસગઢ હાઈકોર્ટના જસ્ટિસ સંજય કુમાર અગ્રવાલને રાજસ્થાન હાઈકોર્ટના નવા ચીફ જસ્ટિસ તરીકે નિયુક્ત કરવામાં આવ્યા છે. અલ્હાબાદ હાઈકોર્ટના ન્યાયાધીશ મહેશચંદ્ર ત્રિપાઠીને બોમ્બે હાઈકોર્ટના નવા ચીફ જસ્ટિસ તરીકે નિયુક્ત કરવામાં આવ્યા છે.

હાઈકોર્ટને લગતો વિવાદ પણ સામે આવ્યો હતો

રાજસ્થાન હાઈકોર્ટમાં પણ આ નિમણૂકો વચ્ચે ઘણો વિવાદ થયો છે. રાજસ્થાન હાઈકોર્ટના કાર્યકારી ચીફ જસ્ટિસ સંજીવ પ્રકાશ શર્મા વિરુદ્ધ ગંભીર અને અભૂતપૂર્વ આક્ષેપો કરવામાં આવ્યા હતા. આ વિવાદ ત્યારે ગંભીર બન્યો જ્યારે સુપ્રીમ કોર્ટના ન્યાયાધીશ જસ્ટિસ સંદીપ મહેતાએ તેમની સામે આ ગંભીર આક્ષેપો કર્યા હતા, જેના કારણે ન્યાયિક ક્ષેત્માં ભારે ચર્ચા થઈ હતી.

પટના અને કલકત્તા હાઈકોર્ટને મળ્યા નવા ચીફ જસ્ટિસ

કાયદા મંત્રી દ્વારા આપવામાં આવેલી જાણકારી અનુસાર, દિલ્હી હાઈકોર્ટના જજ જસ્ટિસ વલ્લુરી કામેશ્વર રાવને પટના હાઈકોર્ટના નવા ચીફ જસ્ટિસ બનાવવામાં આવ્યા છે. બોમ્બે હાઈકોર્ટના વરિષ્ઠ ન્યાયાધીશ જસ્ટિસ રવિન્દ્ર ઘાગેને કલકત્તા હાઈકોર્ટના ચીફ જસ્ટિસ તરીકે નિયુક્ત કરવામાં આવ્યા છે.

પંજાબ, હરિયાણા અને છત્તીસગઢ હાઈકોર્ટમાં નવી નિમણૂકો

જસ્ટિસ અશ્વિનીકુમાર મિશ્રાને પંજાબ અને હરિયાણા હાઈકોર્ટના ચીફ જસ્ટિસ તરીકે નિયુક્ત કરવામાં આવ્યા છે. આ પહેલા તેઓ આ જ હાઈકોર્ટમાં ન્યાયાધીશ તરીકે ફરજ બજાવતા હતા. ઓરિસ્સા હાઈકોર્ટના જસ્ટિસ કૃષ્ણરામ મહાપાત્રાને છત્તીસગઢ હાઈકોર્ટના ચીફ જસ્ટિસ બનાવવામાં આવ્યા છે.

મધ્યપ્રદેશ અને જમ્મુ-કાશ્મીર માટે પણ આદેશ જારી કરવામાં આવ્યા

ગુજરાત હાઇકોર્ટના ન્યાયાધીશ જસ્ટિસ અલ્પેશ યશવંત કોગજેને મધ્યપ્રદેશ હાઈકોર્ટના નવા ચીફ જસ્ટિસ તરીકે નિયુક્ત કરવામાં આવ્યા છે. રાજસ્થાન હાઈકોર્ટના જજ જસ્ટિસ પુષ્પેન્દ્ર સિંહ ભાટીને જમ્મુ-કાશ્મીર અને લદ્દાખ હાઈકોર્ટના ચીફ જસ્ટિસ તરીકે નિયુક્ત કરવામાં આવ્યા છે.

 

કલ્પેશ એન લીંબાસિયા

વિશ્વ સમાચાર રિપોર્ટર