મમતા દીદી બાદ હવે ઉદ્ધવ ઠાકરેનો વારો?

રાજકીય વર્તુળોમાંથી મળતી માહિતી મુજબ, બાગી સાંસદોમાં શરૂઆતમાં થોડો મતભેદ હતો. એક જૂથ ઈચ્છતું હતું કે એકનાથ શિંદે અને અજિત પવારની જેમ અસલી ટીએમસી પર જ દાવો કરીને પક્ષ કબજે કરી લેવો. જ્યારે બીજું જૂથ બધું છોડીને આગળ વધી જવા માંગતું હતું. પક્ષપલટા વિરોધી કાયદામાં ફસાયા વિના સાંસદ પદ બચાવવા માટે આખરે સર્વાનુમતે એવો નિર્ણય લેવાયો કે કાયદાકીય લડાઈમાં પડવાને બદલે કોઈ નવી પાર્ટીમાં સામેલ થઈ જવું એ સૌથી સુરક્ષિત રસ્તો છે. 

બંગાળનો ‘ખેલા’ હજુ શાંત નથી થયો ત્યાં જ મહારાષ્ટ્રના રાજકારણમાં ‘ઓપરેશન ટાઈગર’ની જોરદાર ચર્ચા શરૂ થઈ ગઈ છે. એવી અટકળો ચાલી રહી છે કે ઉદ્ધવ ઠાકરે જૂથની શિવસેનાના કેટલાક નેતાઓ અને સાંસદો મુખ્યમંત્રી એકનાથ શિંદેની શિવસેનાના નેતાઓના સંપર્કમાં છે. જો કે, શિંદે જૂથના નેતાઓએ આ ચર્ચાઓને સંપૂર્ણપણે નકારી કાઢી છે. શિવસેના પ્રવક્તા રાજુ વાઘમારેએ જણાવ્યું હતું કે, આવો કોઈ જ પ્રચાર કે ઓપરેશન નથી ચાલી રહ્યું અને કોઈ પક્ષને તોડવામાં અમારી પાર્ટીને કોઈ રસ નથી. અત્યારે કોઈ ચૂંટણી નથી અને સરકાર પાસે અગાઉથી જ પૂરતી બહુમતી છે. 

હાલમાં લોકસભામાં શિવસેના (UBT) પાસે ૯ સાંસદો છે, જ્યારે એકનાથ શિંદેની શિવસેના પાસે ૭ સાંસદો છે. આ અટકળો વચ્ચે ઉદ્ધવ ઠાકરેએ ૧૪ જૂનના રોજ મુંબઈ સ્થિત ‘માતોશ્રી’ ખાતે પોતાના લોકસભા સાંસદોની ઇમરજન્સી બેઠક બોલાવી હતી. પરંતુ આ બેઠકમાં જે બન્યું તેનાથી ‘ઓપરેશન ટાઈગર’ની આશંકાઓ માત્ર અફવા હોય તેવું લાગતું નથી.

શિવસેના (UBT) ના કુલ લોકસભા સાંસદો: ૯ 

બેઠકમાં રૂબરૂ હાજર રહેલા સાંસદો: ૪ 

બેઠકમાંથી ગેરહાજર રહેલા સાંસદો: ૫ 

ગેરહાજર રહેલા સાંસદો અંગે પક્ષ તરફથી અલગ-અલગ બહાના અને ખુલાસા રજૂ કરવામાં આવ્યા છે:

બેઠકમાં હાજર રહેલા સાંસદ અનિલ દેસાઈએ દાવો કર્યો કે અમે ૪ સાંસદો રૂબરૂ હાજર હતા અને બાકીના ૫ લોકો અંગત કામના કારણે વર્ચ્યુઅલી જોડાયા હતા. તમામ ૯ સાંસદો એકજૂથ છે.

અન્ય નેતા અરવિંદ સાવંતે જણાવ્યું કે મેડિકલ ઇમરજન્સીના કારણે કેટલાક સાંસદો આવી શક્યા નથી. એક સાંસદના બાળકની તબિયત ખરાબ હોવાથી તે હોસ્પિટલમાં છે, એક સાંસદની પત્ની બીમાર છે, જ્યારે એક સાંસદના ઘરે પુત્રીના લગ્ન છે. કેટલાક સાંસદોની ટ્રેન કે ફ્લાઈટ ચૂકી ગઈ હોવાના અને ‘મેડિકલ લીવ’ ની અરજી આપી હોવાના અહેવાલો પણ સામે આવ્યા છે.

જો કે, રાજકીય વિશ્લેષકો વર્ચ્યુઅલ હાજરીના દાવા પર સવાલો ઉઠાવી રહ્યા છે. જો કોઈના ઘરે લગ્ન હોય તો પણ રાજનીતિના આવા નાજુક વળાંક પર બોલાવાયેલી કટોકટીની બેઠક માટે સમય કેમ ન કાઢી શકાય? ભલે અત્યારે સીધી આગ ન દેખાતી હોય, પણ ધુમાડો ચોક્કસ દેખાઈ રહ્યો છે.

પૂર્વથી લઈને પશ્ચિમ ભારત સુધી ચાલી રહેલી આ રાજકીય ઉથલપાથલને સોશિયલ મીડિયા પર સિનિયર પત્રકારોએ ‘ઓપરેશન ડિલિમિટેશન’ નામ આપ્યું છે. આ નામ આપવા પાછળનું ગણિત પણ સ્પષ્ટ છે. આ બધી જ હિલચાલ સંસદના આગામી ચોમાસુ સત્રમાં એનડીએ સરકાર માટે મદદરૂપ સાબિત થઈ શકે છે. ટીએમસીમાંથી બળવો કરનાર કાકોલી ઘોષે પહેલેથી જ કહી દીધું છે કે તેમનું જૂથ સંસદમાં એનડીએને સમર્થન આપશે.

બે તૃતીયાંશ બહુમતી માટે તલપાપડ NDA 

કેન્દ્રની ભાજપ શાસિત એનડીએ સરકાર મોનસૂન સેશનમાં ફરીથી સીમાંકન બિલ (Delimitation Bill) લાવવાની તૈયારી કરી રહી છે. અગાઉ લાવવામાં આવેલું ૧૩૧ મું બંધારણ સુધારો વિધેયક જરૂરી સંખ્યાબળના અભાવે પસાર થઈ શક્યું નહોતું. હવે જો અલગ-અલગ પક્ષોમાંથી સાંસદો તૂટીને એનડીએના સમર્થનમાં આવી જાય અને સંસદમાં બે-તૃતીયાંશ (૨/૩) બહુમતી મળી જાય, તો આ બિલ સરળતાથી પાસ થઈ શકે છે.

ગયા સંસદ સત્રમાં મહિલાઓને ૩૩ % અનામત આપવા માટેના કાયદાકીય સુધારા અને પરિસીમન બિલના સમર્થનમાં ૨૯૮ મતો પડ્યા હતા, જ્યારે વિરોધમાં ૨૩૦ મતો પડ્યા હતા. ટીએમસીના ૨૦ સાંસદોના સમર્થનથી હવે એનડીએનું સંભવિત સંખ્યાબળ ૩૧૨ સુધી પહોંચી શકે છે. જો ઉદ્ધવ ઠાકરેની બેઠકમાંથી ગાયબ થયેલા ૫ સાંસદો પણ આ જૂથમાં જોડાય, તો આ આંકડો ૩૧૭ પર પહોંચી શકે છે.

અન્ય કયા કયા પક્ષોના સાંસદ તૂટી શકે? 

જો કે, બે-તૃતીયાંશ બહુમતીના જાદુઈ આંકડા સુધી પહોંચવા માટે હજી પણ લાંબી મજલ કાપવાની બાકી છે. હાલમાં ૩ બેઠકો ખાલી હોવાને કારણે ગૃહની કુલ સંખ્યા ૫૪૦ છે, તેથી બે-તૃતીયાંશ બહુમતી માટે ૩૬૨ ના બદલે ૩૬૦ સભ્યોના સમર્થનની જરૂર પડશે. વર્તમાન પરિસ્થિતિ જોતા દરેકની નજર એ વાત પર ટકેલી છે કે આ ઓપરેશનના નિશાના પર હવે પછીનો પક્ષ કયો હશે? રાજકીય ચર્ચાઓ મુજબ આગામી જોખમ તમિલનાડુમાં ડીએમકે પર તોળાઈ રહ્યું છે, અને ઉત્તર પ્રદેશના આગામી ચૂંટણી સમીકરણો જોતા સમાજવાદી પાર્ટી પણ આ વમળથી બહાર હોય તેવું લાગતું નથી.