સાવધાન! તમારી સવારની તાજગીભરી ચા ‘ઝેરી’ તો નથી ને?

આપણા દેશમાં મોટા ભાગના ઘરોમાં સવારની શરૂઆત ચાના કપ વિના અધૂરી ગણાય છે. પરંતુ, શું તમે જાણો છો કે જે ચા તમને સ્ફૂર્તિ આપે છે, તે કદાચ તમારા સ્વાસ્થ્યને ગંભીર નુકસાન પહોંચાડી રહી હોય? હાલમાં જ ઉત્તર પ્રદેશના બારાબંકીમાં સ્પેશિયલ ટાસ્ક ફોર્સ (એસટીએફ) દ્વારા એક આઘાતજનક રેકેટનો પર્દાફાશ કરાયો, જેમાં ચા પાવડરમાં હાનિકારક સિન્થેટિક કલર અને કેમિકલ ભેળવીને બજારમાં વેચાણ માટે મૂકી દેવાતી હતી. જો કે, દેશના વિવિધ રાજ્યોમાં આ પ્રકારના કૌભાંડ બહાર આવી ચૂક્યા છે.

ખોરાકમાં ભેળસેળના આવા કિસ્સા આખા દેશ સહિત ગુજરાતમાં પણ અવારનવાર સામે આવતા રહે છે. હિંમતનગર અને સાબરકાંઠા જેવા વિસ્તારોમાં અગાઉ બ્રાન્ડેડ પ્રોડક્ટ્સના નામે નકલી ચા અને અન્ય નકલી સામગ્રી બનાવતી ફેક્ટરીઓ ઝડપાઈ ચૂકી છે. નફાખોરીના ચક્કરમાં ભેળસેળિયાઓ ચાની પત્તીમાં લાકડાનો વહેર, ચામડું, નકામી કેમિકલવાળી ડાઈ અને અગાઉ વપરાઈ ગયેલી ચાની પત્તીને રંગીને બજારમાં વેચી દે છે. આ કેમિકલયુક્ત નકલી ચા પીવાથી લિવર, કિડની અને પેટની ગંભીર બીમારીઓ થઈ શકે છે.

ચિંતાની વાત એ છે કે સામાન્ય આંખે જોતા અસલી અને નકલી ચા વચ્ચેનો તફાવત ખબર પડતો નથી. પરંતુ ફૂડ સેફ્ટી એક્સપર્ટ્સ અને એફએસએસએઆઈ (ફૂડ સેફ્ટી એન્ડ સ્ટાન્ડર્ડ્સ ઓથોરિટી ઓફ ઈન્ડિયા) એ કેટલીક એવી સરળ રીતો જણાવી છે, જેનાથી તમે ઘરે જ મિનિટોમાં જાણી શકશો કે તમારી ચા શુદ્ધ છે કે ઝેર.